FA'ASILASILAGA O lenei pepa ua fa'aliliuina ni fesili ma tali e fa'amalamalamaina ai le mataupu o le fa'aolataga a le Atua ma le fesili: E fa'apefea ona tatou sao atu ile malo le Atua? O mataupu o lo'o ua 'oto'oto mai lana Afioga Paia. (O ni mata'itusi ua le mafai ona faaogaina e iai upu fa'amamafa o lo'o galueaina ina ia mafai ona fa'aaogaina i se taimi a sau pe pule alofa le Atua tatou te aulia le ola ma le malosi, Fa'afetai .) "PE ALOFA 'EA LE ATUA IA TE 'OE?" F. E iai nisi taimi ou te masalosalo ai pe alofa o Ia ia te a'u. Afai o Ia o se Atua alofa, aisea ua tele ai pea o tiga ma fa'anoanoaga i le lalolagi?
T. I Lana tusi o le Tusi Paia, ua fa'aali mai e le Atua o a tatou agasala o le mafua'aga lea o o tatou tiga ma fa'anoanoaga. E moni ua fa'aali mai e le Atua Lona alofa i le lalolagi atoa, ina ua tatou faitau i se tasi o fuaiupu masani mai le Tusi Paia fa'apea:
Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau. Ioane 3:16
A'e peitai, o le alofa o le Atua e fuafua. O lo'o molimau mai le Tusi Paia:
E inosia e Ieova le ala o e amio leaga, a e alofa o ia i le ua tausisi atu ile amiotonu. Faataoto 15:9
Aua ua silafia e Ieova le ala o e amiotonu; a e fano lava le ala o e amio leaga. Salamo 1:6
F. E! A'o a'u ou te le amio leaga; ou te lelei toe amio-mama. E moni, e sili atu ona tele o mea lelei sa ou faia i lo'u olaga nai lo mea leaga . Pe fa'apefea la ona alatatau lenei fuaiupu ia te a'u?
T. A fuafua i le amiotonu fa'a-le-Atua, e o'o lava i le tagata e matua amio lelei o na silafia e le Atua, o ia lava o se tagata agasala o le alu atu i Seoli. O lo'o a'oa'o mai le Tusi Paia, e leai se tasi e amiotonu a'ia'i; e leai se tasi e mafai ona sao atu ile lagi ona o ia lava. Peita'i, o tatou o tagata agasala ma ua nofo sala i tatou uma i luma o le Atua;
fa'apei ona tusia, e leai se amiotonu, e leai lava se tasi, e leai se na te lagona, e leai se saili ile Atua. Roma 3:10-11
E sili le faa'ole'ole o le loto i mea uma, ma ua matu leaga lava, po o ai na te mafaia ona iloa? Ieremia 17:9
F. Afai o a'u o se tagata matua agasala leaga i le silafaga a le Atua, o le a se mea o le a faia e le Atua ia te a'u?
T. Ua a'oa'o mai le Tusi Paia fa'apea; o tagata amio leaga uma o le a fa'asalaina lea i le fa'asalaga e le uma i le nofoaga e ta'ua o Seoli.
Aua ua si'a le afi i lo'u ita, e mu ifo foi ia e oo lava i seoli e maulalo lava; e faaumatia ai le lalolagi ma ona fua, e mu ai foi faavae o mauga. Ou te faaputuina i luga ia te i latou mea leaga; ou te faauma atu a'u u fanafana ia te i latou. E tinovavale i latou i le oge, e faaumatia foi i le ma'i vevela, ma le mala e fano ai; ou te auina foi manu feai ia te i latou, ma mea oona o gata o le eleele. Teuteronome 32:22-24
F. E! Ailoga lava e moni lena mea o Seoli? Ailoga e fa'apena sona leaga tele?
T. Ioe, ae paga lea, o Seoli o le mea moni ma le matua leaga lava mo so'o se tasi na te le iloaina le Ali'i o Iesu Keriso o le Fa'aola. E tele ni molimau mai le Tusi Paia e uiga ia Seoli, e fa'ailoa mai ai o se nofoaga o le puapuagatia ma le mafatiaga tele e le fa'aumatia.
Ai se tasi ua iloa ua le tusia i le tusi o le ola, ua lafoina lea i le lepa afi. Faaaliga 20:15
E faapea foi i le gata'aga o le lalolagi; e o atu le au agelu e vavae ese i e amio leaga ma e amiotonu, ona latou lafoina lea ia te i latou i le ogaumu aasa; e i ai le tagiaue ma le lilivau o nifo. Mataio 13:49-50
... pe a faaalia le Alii o Iesu mai le lagi, faatasi ma agelu o lona malosi, i le afi mumu, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu Keriso; e faasalaina i latou lava i le fanoga e faavavau lava, ia te'a ma le Alii ma le mamalu o lona malosi; 2Tesalonia 1:7-9
F. Se! Matua leaga tele! Aisea ua faia ai e le Atua lena mea o Seoli?
T. O Seoli e matua leaga lava, ma ua ala ona faia e le Atua Seoli ona e finagalo o Ia mo le tagata ina ia tali atu i le Atua e tusa ma ana agasala. O le fa'amasinoga tonu ma le amiotonu a le Atua ua finagalo ai o Ia ina ia faia se totogi o agasala a tagata uma lava.
Aua o le oti o le totogi lea o le agasala; ...Roma 6:23
Aua tatou te tutu atu uma lava i luma o le nofoa faamasino o Keriso e tatau ai; ina ia taitasi ma talitali i mea na faia i le tino, e pei o mea na faia, pe lelei pe leaga. 2Korinito 5:10
A ou te fai atu ia te outou, o upu faatauvaa uma e faia e tagata, latou te talatala atu ai le tala i le aso faamasino. Mataio 12:36
F. O lona uiga la, o le i'uga o le lalolagi o le a toe fa'atutu mai tagata uma lava ina ia fa'amasinoina i latou ma auina atu i Seoli?
T. O lea lava, se'i vagana ai ua tatou maua se tasi e fai ma o tatou sui na te tauaveina la tatou fa'asalaga; o le fa'afanoga lea e fa'avavau mai a tatou agasala. O lea sui, o le Atua lava lea, na afio mai i lenei lalolagi i le tagata o Iesu Keriso na te tauaveina le toasa o le Atua mo i latou uma o e ua talitonu ia te Ia.
O i tatou uma ua se i tatou e pei o mamoe, ua taitasi ma faasaga i lona lava ala; a ua faaoo ia te ia e Ieova le amio leaga o i tatou uma. Isaia 53:6
A ua manu'a o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou. Isaia 53:5
Aua na ou tuuina atu ia te outou mea muamua o mea foi ia na ou maua foi e a'u; na maliu Keriso ma sui o a tatou agasala, pei ona tusia; na tanu fo'i o ia, ma toe tu mai i le aso tolu, pei o upu ua i Tusi. I Korinito 15:3-4
Aua o ia na le iloa le agasala, na faia lea e ia ma agasala, o le sui o i tatou; ina ia avea i tatou ma amiotonu a le Atua ia te ia. 2 Korinito 5:21
F. Po ua e fai mai 'ea la, afai ou te fa'atuatua ma talitonu ia Keriso e avea ma o'u sui, aua o Ia ua uma ona fa'asalaina mo a'u agasala, ona o'u le toe popole lea ia Seoli?
T. Ioe, o lea lava! Afai ua ou talitonu ia Keriso o Ia o lo'u Fa'aola, ona faia lava lea e pei lava ua uma ona ou tula'i i le Nofoalii Fa'amasino a le Atua, o Keriso lava o lo'u Sui ua uma ona ia totogi i a'u agasala.
O le faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga. Ioane 3:36
F. A'o le a la le uiga o le fa'atuatua ia te Ia? Afai ou te talitonu i mea uma olo'o fai mai ai le Tusi Paia e uiga ia Keriso o le Fa'aola, pe ua fa'aolaina ea la a'u mai Seoli?
T. O le a le uiga o le fa'atuatua ia Keriso, e le na o le ioe o lou mafaufau i mea tonu uma o loo i le Tusi Paia; o lona uiga ua tatou fa'atuatua tasi ia te Ia, ma ua tu'u atu atoatoa vaega uma o o tatou olaga i le moni o le Tusi Paia. O lona uiga ua tatou fa'asaga ese mai a tatou agasala, ma auauna atu ia Iesu Keriso ua avea mo tatou Ali'i.
E leai se na te mafaia ona auauna i alii e toalua; au e 'ino'ino o ia i le tasi, a e alofa atu i le tasi; a le o lea, e faapipii atu ia i le tasi, a e faaleaoga i le tasi. Tou te le mafaia ona auauna i le Atua atoa ma mamone. Mataio 6:24
O lenei ina salamo ia outou ma outou liliu, ina ia sloiesea a outou agasala, ina ia oo mai ai o tausaga e filemu ai mai luma o le Alii. Galuega 3:19
F. Po ua e fai mai 'ea la e leai lava se isi auala e mafai ai ona ou sola ese mai Seoli, se'ia vagana ai ua ou ui atu ia Iesu? Ae fa'apefea la isi tapuaiga lotu? Pe o le a o uma i latou olo'o mulimuli i ia tapuaiga i Seoli?
T. Ioe. O lea lava. E tasi lava lo tatou auala i le ola e fa'avavau. I le ma lea, e le mafai lava ona latou sosola ese mai lea mea; aua o le a au'ili'iliina uma lava a tatou agasala e le Atua. Ma ua fa'atonu mai le Atua e auala mai le Tusi Paia ina ia totogi a tatou agasala uma. O nisi tapua'iga, ua le mafai ona latou maua se tasi e fai ma sui o a latou tagata. Ua na o Iesu Keriso lava e talafeagai ona Ia tau'aveina a tatou solitulafono, ma fa'aolaina i tatou.
E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou. Galeuga 4:12
Ua fetelai mai Iesu: ... O a'u nei le ala, ma le upu moni, ma le ola; e le alu atu lava se tasi i le Tama, pe a le ui mai ia te au. Ioane 14:6
a e afai tatou te faaali a tatou agasala, e faamaoni o ia, ma le amiotonu e faamagalo ai a tatou agasala, ma faamama mai ia i tatou i amioletonu uma lava. I Ioane 1:9
F. Pe le o a'oa'o mai ea le Tusi Paia ina ia ou toaga i le lotu ma ia papatisoina a'u? E le lava ia mea e fa'aolaina ai a'u?
T. Ioe, e moni lava, e tatau ona tatou faia ia mea; a'e le fa'aolaina ai i tatou i ia mea. E leai lava ni ituaiga galuega e mafai ona maua ai ma fa'amautuina ai lo tatou fa'aolataga. O le fa'aolataga, ua foaina mai lea i le pule aoao a le Atua, ona o Lona alofa matalasi ma Lona fiafia. O le fa'aolataga, "e le ona o galuega, ina ne'i mitamita se tasi." (Efeso 2:9).O le Atua ua Ia le vailuaina Lona viiga ma Lona mamalu ma se tagata e tasi, "ina ne'i mitamita se tagata e toatasi i ona luma" 1Korinito 1:29
F. O lenei la ua ou fememea'i. Ou te le fia alu i Seoli. O le a la se mea e tatau o na ou faia ina ia ou le alu atu i Seoli?
T. E tautau ona tatou manatua, ua na'o le Atua lava e mafai ona fesoasoani ia te o'e. Ua auala mai lea i na ua tatalaina e le Atua o tatou taliga fa'ale-agaga ma ua tatou malamalama ai i lana vala'au e ala mai i lana Afioga Paia. O lea e tatau ai ona tuu atu atoatoa o'i tatou ta'ito'atasi, i le pule ma le alofa mutimutivale a le Atua. Ina ua tatou va'ai atu i o tatou olaga le mautinoa ma le gaogao, o se tagata agasala o lo'o tagi atu i le Atua na te lave'ina oe.
O le telona fo'i, ua tu mamao atu, e le mafai ona tepa ae ona mata i le lagi, a ua popo lona fatafata, ua faapea atu, Le Atua e, ia e alofa mai ia te au le tagata agasala. Luka 18:13
... Alii e, se a le mea e tatau ona ou faia ou te ola ai? Ua fai atu i laua, Ina faatuatua ia i le Alii o Iesu Keriso, e ola ai oe atoa ma lou aiga. Galuega 16:30-31
au e faaolaina i latou uma o e valaau i le suafa o le Alii. Roma 10:13
F. Pe fa'afepea ona ou fa'atuatua ia Iesu Keriso, pe afai e le lava so'u malamalama ia te Ia?
T. Ole tala fiafia lea, e le gata i le fa'aolataga na saunia e le Atua mo i tatou e auala mai i lo tatou Ali'i o Iesu Keriso, a ua ia tu'uina mai ia te'i tatou le fa'atuatua e talitonu ai ia te Ia e ala mai lea i lana Afioga Paia o le Tusi Paia. Afai ua e malamalama ina ua faitauina le Tusi Paia, ua tatau loa ona e fa'amaulalo ma tatalo atu i le Atua ina ia foa'i atu ia te 'oe le fa'atuatua ia Iesu Keriso lou Fa'aola e pei ona fa'atonu mai.
Aua o le alofa tunoa ua faaolaina ai outou i le faatuatua; e le mai ia te outou foi lea, a o le mea ua foaiina mai e le Atua; Efeso 2:8
Olo'o galue fa'apitoa le Atua e ala mai i le Tusi Paia, e tuuina mai lena fa'atuatua. O lea la, afai e moni ma fa'amaoni lou mana'o ina ia fa'aolaina o'e e le Atua e tatau nei ona e fa'aaogaina so'o se avanoa e te fa'alogologo ai ma su'esu'e le Tusi Paia, au ua na o le pau lava lea o le Upu, po'o le Afioga Tu'u a le Atua mo le tagata.
O lenei e tupu le faatuatua i le tau logologo atu, o le taulogologo atu foi o i le afioga a le Atua lea. Roma 10:17
F. Pe o lona uiga ea la, e tatau ona tu'u atu mea uma i le Atua?
T. Ioe. E finagalo le Atua ina ia tatou o mai ia te Ia ma le loto maualalo, ma fa'ailoa atu ua tatou iloa a tatou agasala, ma le malamalama'aga e le mafaia ona tatou faia o se mea e tasi, na o le fa'atuatua tasi atu ia te Ia.
... ua fetalai mai ai Ieova; a o lenei le tagata ou te vaai i ai, o le ua faamaulalo ma le loto tiga, o le ua gatete foi i la'u upu. Isaia 66:2
E ala ona tatou fiafia i le agasala aua o tatou o tagata agasala. O le mea lea, e tatau ai ona tatou tatalo atu i le Atua ina matua fa'ainoinoina i tatou mai a tatou agasala. Ma afai tatou te manana'o moni i le fa'aolataga a le Atua, o le'a amata fo'i ona tatou liliuese mai a tatou agasala, ina ua fesoasoani le Atua na te fa'amalosia ma oponi i tatou. Aua ua tatou iloa o a tatou agasala, e aveina ai tatou i Seoli.
O le Atua foi, ua na faatuina mai lana Auauna o Iesu, ua auina mai o ia e muamua mai ia te outou, e faamanuia mai ia te outou i le faaliliueseina outou taitasi i a outou amioleaga. Galuega 3:26
F. Ou te le iloa pe ua ou sauni e fai lena mea. Ou te mana'omia sina taimi ou te mafaufau atili ai.
T. Paga lea, tatou te le mautinoa pe toe iai se taimi. I le ma lea, tatou te leiloa le finagalo o le Atua pe tatou te aulia le aso a taeao. O le fetalaiga a le Atua na fai i le tagata na fa'atuatua tele i mea o lenei lalolagi, o lana fetalaiga fo'i lea olo'o fetalai mai ai ia te oe ma a'u.
O oe na le vale, e aamiina atu lou agaga nai ia te oe ile po nanei; a e fai ma ai mea ia ua e saunia? Luka 12:20
O lo'o molimau mai fo'i le Tusi Paia fa'apea ua lata mai le i'uga o le lalolagi.
O loo latalata mai le aso tele o Ieova, e lata mai lava, o loo matua tele vave mai lava, o le taalili o le aso o Ieova; e matua tagiaue ai le toa. E fai lea aso ma aso o le toasa, o le aso o le puapuaga ma le tiga, o le aso o le faatafunaina ma le faagaogaoina, o le aso o le pouliuli ma le pogisa, o le aso o ao ma le faamalumalu. Sefanaia 1:14-15
F. Po ua latalata mai ea la le aso o Lona toasa ma le Aso o le Fa'amasinoga? Pe fa'apefea ea ona tatou iloa ua latalata mai le iuga o le lalolagi?
T. Ua mafua ona tatou iloa ua latalata mai le iuga o le lalolagi ona e tele ni fa'amatalaga ua tu'uina mai e le Atua i le Tusi Paia e ta'ua mai ai ua latalata mai le i'uga o le lalolagi.
E maalili foi loto o tagata e to'atele, ona ua tupu tele o le amio leaga ... E tala'iina atu foi lenei tala lelei o le malo i le atu laulau uma, e fai ma molimau i nuu uma; ona oo mai lea o le gataaga. Mataio 24:12,14
Au e tutu mai Keriso pepelo, ma perofeta pepelo, latou te faia foi fa'ailoga tetele ma vavega, ina ia faasese ai i e ua filifilia lava, pe afai e mafai ai. Mataio 24:24
F. O le a se isi mea e tupu mai i le taimi tonu o le iuga o le lalolagi, e ese mai ai i le Aso o le Fa'amasinoga?
T. O i latou uma lava ua fa'atuatua ia Iesu, e avea ma o latou Fa'aola, o le a liua mai o latou tino tuai i o latou tino paia, ma fa'atasi atu loa ma Keriso e o'o lava i le fa'avavau.
Aua e afio ifo mai le lagi le Alii lava, ma le alaga, ma le leo o le agelu sili, ma le pu a le Atua. E muamua foi ona toe tutu mai o e ua oti o ia Keriso; ona faafuasei lea ona aveina ae o i tatou o e ola ma totoe, faatasi ma i latou i ao, ina ia fetaiai ma le Alii i le va nimonimo, ona tatou faatasi pea lava lea ma le Alii. 1Tesalonia 4:16-17
I le ma lea, o le fa'aumatia foi e le Atua le lalolagi uma i le afi, ma toe fausia e Ia o ni lagi fou, ma le lalolagi fou, e pule aoao ai Keriso ma i latou uma o e ua talitonu ia te Ia, e fa'avavau faavavau lava.
A e sau le aso o le Alii pei o se gaoi i le po, e mavaeeseina ai le lagi ma le gogolo tele, e te'a eseese ai foi o mea na fai a'i ina ua mu, o le lalolagi foi ma galuega o i ai e susunuina lava. ... A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu. 2Peteru 3:10,13
F. Aisea ua tu'uina mai ai e le Atua lenei lapataiga?
T. Manatua le nu'u o Nineva ma lo latou nofosala i luma o le Atua. Sa lapata'ia e le Atua lenei nu'u ina ia salamo. Sa tu'uina iai e le Atua le avanoa i aso e fasefulu e salamo ai; o lo'o fa'apea fo'i ona lapata'i mai le Atua e auala mai le Tusi Paia: Ua latalata mai le iuga o le lalolagi atoa.
Ua amata ona ulu atu o Iona ile aai, o le savaliga o le aso e tasi, na alaga foi o ia, ua faapea atu, E toe fagafulu po ona faaumatia lea o Nineva. Iona 3:4
F. O lea la mea a tagata Nineva na fai?
T. Na amata mai lava i le Tupu se'ia o'o atu lava i tagata uma o lea a'ai, ua latou fa'amaulalo atu o latou loto i le Atua, ma ua latou salamo mai a latou agasala, ma ua latou fa'atoga atu ile Atua mo Lona alofa tunoa.
a ia ufitia lava tagata ma manu i ie talatala, ma ia latou matua alalaga atu i le Atua; ia latou taitasi foi ma liliu mai i lana amioga leaga, ma le faasaua ua i o latou lima. O ai se na te iloa, atonu e liliu mai le Atua, ma salamo, ma liliu ese i lona toasa mamafa, ina ia le fano ai i tatou. Iona 3:8-9
F. Pe na fa'afofoga mai ea l le Atua i la latou talosaga?
T. O lea lava. Sa faaolaina e le Atua le tele o tagata o Nineva.
F. Pe toe mafai 'ea la ona ou tagi atu ile Atua mo lona alofa tunoa, ina ia ou le alu atu i lana fa'amasinoga?
T. Ioe. O loo iai pea le avanoa mo lou faaolaina, e ui lava ina olo'o ua utiuti lea taimi.
Ia outou saili ia Ieova manu o mafai ona maua o ia; ia outou valaau ia te ia manu o latalata mai o ia; Isaia 55:6
pe sao faapefea i tatou pe a faatamala i le olataga e matua tele? sa muai fetalaia mai e le Alii, ona faamaonia mai lea ia i tatou e i latou sa faalogo ia te ia. Eperu 2:3
O loo i le Atua lo'u olataga ma lo'u mamalu; o lo'u papa malosi ma lo'u malu o loo i le Atua ia. Le nuu e, ia outou faatuatua ia te ia i aso uma; ia outou momoli atu o outou loto i ona luma; o lo tatou malu o le Atua lea. Sela. Salamo 62:7-8
Pe ua e nofo sauni 'ea feiloa'i atu i le Atua?
Fa'afetai tele mo le avanoa e talatalanoa atu ai e tusa ma le fe'au a le Atua. Ioe, o se fesili e uiga o lo'o fafagu mai ia i tatou e uiga i lo tatou olaga fa'ale-agaga pe afai e mavae atu lenei ola. Afai ta te le o saunia mo lena malaga, e le mafai ona ta fa'atali fa'apea se'i sau se aso aua e leai se na te iloa le finagalo o le Atua ma lana vala'au paia. I le ma lea, e leai lava se tasi avanoa e toe tu'uina mai e le Atua pe a o'o mai le oti. E le toe iai se tasi lava avanoa e toe maua ai le ola e fa'avavau pe a mavae atu lenei ola. Eperu 9:27 " Pei ona tofia foi mo tagata ia tasi lo latou oti, a e mulimuli ane o le faaamasinoga;" Afai e iai sau fesili e uiga i lenei pepa po'o ni fesili e uiga i le Tusi Paia, po'o le taimi o polokalame i le leitio, fa'afeso'ota'i mai le te tuatusi lea:
Sagaga Tuiasosopo
C/- Family Radio
Oakland, Ca. 94621, USA
1(800) 543-1495 ext 303
e-mail address:
Mo polokalame i le leitio (AM, FM, Shortwave) e uiga i fesili ma tali mai le Tusi Paia i le gagana fa'aperetania fa'afeso'ota'i mai mo taimi ma le ofisa fa'asalalau i lou itumalo.
http://www.familyradio.com Fesili po'o se Manatu